Николай Павлов – Тыаһыт “Луохтуур алҕаһа” кэпсээнин ырытыыга-анаарыыга күрэх түмүктэннэ

“Күрүлгэн” сурунаал, “Кыым” хаһыат,” Кыым.ру саайт эрэдээксийэлэрэ, ону таһынан Уус-Алдан уонна   Хаҥалас улуустарын  кииннэммит бибилэтиэкэлэрин салалталара Николай Павлов – Тыаһыт 1969 сыллаахха “Хотугу сулус” сурунаалга бэчээттэммит уонна сонно тута күүстээх санаа үллэстиитин таһаарбыт “Луохтуур алҕаһа” кэпсээнин ырытыыга-анаарыыга  биллэрбит күрэхтэрэ ситиһиилээхтик түмүктэннэ.

Күрэх биир дойдулаахпыт Николай Павлов – Тыаһыт эһиил туолар төрөөбүтэ 120 уонна кини айар үлэтин дириҥник үөрэппит чинчийээччи Н.З.Копырин быйыл бэлиэтэнэр  төрөөбүтэ 100 сылларыгар ананан ыытылынна. Күрэххэ барыта 19 үлэ киирбититтэн, Покровскай куораттан  88 саастаах ытык кырдьаҕас Слепцов Михаил Егорович “Күүһүн сүтэрбэт айымньы” диэн анаарыытынан суруйааччы, уран сурук кириитигэ, тылбаасчыт Н.Н.Павлов- Тыаһыт аатынан анал бирэмийэнэн наҕараадаланна.

Бүгүн Слепцов М.Е. кыыһыгар Черкаева Мотрена Михайловнаҕа добун суругу, анал бириэмийэни туттардыбыт. Кыайыылаахтарга уонна бары кыттааччыларга истиҥ махталбытын тиэрдэбит.