«Чолбон өй күрэһэ» Хаҥалас сиригэр

Быйыл Россияҕа Дьиэ кэргэн, Саха Өрөспүүбүлүкэтигэр Оҕо саас сылларыгар аналлаах “Чолбон” сурунаал эрэдээксийэтэ дьиэ кэргэнинэн ааҕыыны көҕүлүүр сыаллаах  саҥа улахан бырайыагы толкуйдаан, “Чолбон өй күрэһэ. Улахан оонньуу”  бастакы түһүмэҕин улуустарынан кэрийэн ыыта сылдьар. Бүгүн Хаҥалас сиригэр бэрт астык, сонун күрэх буолла. Барыта 6 дьиэ кэргэн хамаандата кэлэн кытыннылар: Осиповтар  (Кытыл Дьура сэл.), Афанасьевтар (Улахан Аан сэл.), Филипповтар,  Острельдиннар  (Покровскай к.) Самсоновтар,  Скрябиннар (Күөрдэм сэл.). Бу оонньууга оскуола оҕото төрөппүттэрин уонна эбэлэрин, эһэлэрин кытта, ол эбэтэр үс көлүөнэ дьон кыттар.

Күрэхтэһии 4 түһүмэхтэн турар: “Саха суругунан уус-уран литературатын төрүттээччилэр”,  “Бастакы норуодунай суруйааччылар”, “Сэрии кэминээҕи литература, 60-90-с сыллардааҕы литература”, “Аныгы кэм литературата”.   «Чолбон” сурунаал бас эрэдээктэрэ Гаврил Гаврильевич Андросов бэйэтэ иилээн-саҕалаан, этэн-тыынан, бэрт сэргэхтик ыытта. Түһүмэх аайы эппиэттэр тутатына көрдөрүллэн,  быһаарыллан бэриллэллэр. Ооньуу бэрт тэтимнээхтик, интэриэһинэйдик барда. 

Күрэхтэһии түмүгүнэн кыайыылааҕынан Улахан Аан сэлиэнньэтиттэн Афанасьевтар дьиэ кэргэн, иккис миэстэҕэ Кытыл Дьураттан Осиповтар, үһүс миэстэҕэ Покровскайтан Острельдиннар дьиэ кэргэн буоллулар.

Оонньууга 85 сааһыгар сылдьар ытык кырдьаҕас Николай Михайлович Острельдин кытынна. “Наһаа үчүгэй күрэххэ кытынным, син боппуруостары билэр эбиппин, үксүн таайдым. Сиэним уол икки боппуруоһу эптэ,” — диэн санаатын үллэһиннэ. Муҥутуур кыайыылаахтар Афанасьевтар дьиэ кэргэн эһэлэрэ Александр Михайлович, тыа хаһаайыстыбатын бэтэрээнэ, ийэлэрэ Варвара Александровна, бухгалтер идэлээх, уола Владик 9 кылаас үөрэнээччитэ. Кыайыылаах кыттааччы Александр Михайлович санаата: “Cаха литературатын уруккаттан сэҥээрэн ааҕабын, син билэбин. Дьэ ол эрээри бэлэмнэммит боппуруостарым суохтар. Хата, сиэним Владик элбэх ыйытыкка сөптөөх хоруйдары биэрэн сөхтөрдө. Интэриэһинэй күрэх буолан ааста».

Афанасьевтар дьиэ кэргэн өрөспүүбүлүкэҕэ ыытыллар түһүмэххэ Хаҥалас улууһун чиэһин көмүскүү кыттыахтара. Күрэххэ кыттыбыт бары хамаандалар туоһу сурук туттулар, кыайыылаахтар бэлиэ суругунан, кинигэ бэлэҕинэн наҕараадаланнылар.